Exo 7 | NdeIBE | STEP | UJehova wasesithi kuMosi, “Khangela, sengikwenze waba nguNkulunkulu kuFaro, njalo umfowenu u-Aroni uzakuba ngumphrofethi wakho.

Exodus 7

1 UJehova wasesithi kuMosi, “Khangela, sengikwenze waba nguNkulunkulu kuFaro, njalo umfowenu u-Aroni uzakuba ngumphrofethi wakho. 2 Uzakhuluma konke engizakulaya khona njalo umfowenu u-Aroni uzatshela uFaro ukuthi avumele abako-Israyeli ukuba basuke elizweni lakhe. 3 Kodwa ngizakwenza inhliziyo kaFaro ibe lukhuni, njalo lanxa ngizakwandisa izimangaliso zami elizweni laseGibhithe, 4 kasoze alilalele. Sekunjalo ngizakwelula isandla sami phezu kweGibhithe, njalo ngezenzo zami zokwahlulela ezilamandla, ngizakwahlukanisa abantu. 5 Njalo abantu baseGibhithe bazakwazi ukuthi ngempela mina nginguJehova lapho sengiselula isandla sami phezu kweGibhithe, besengikhupha abako-Israyeli kulelolizwe.”

6 UMosi lo-Aroni benza njengokulaywa kwabo nguJehova.

7 UMosi wayeleminyaka engamatshumi afica minwe mibili ubudala, u-Aroni wayeleminyaka engamatshumi afica minwe mibili lantantu, ngesikhathi bekhuluma loFaro.

Induku ka-Aroni iba yinyoka

8 UJehova wathi ku-Mosi lo-Aroni, 9 “Uma uFaro angathi kini limenzele isimangaliso, wena uzakuthi ku-Aroni, “Thatha intonga yakho uyiphose phambi kukaFaro, izaphenduka ibe yinyoka.”

10 Ngakho uMosi lo-Aroni baya kuFaro. Bafika benza njengokulaywa kwabo nguJehova. U-Aroni waphosa intonga yakhe phansi phambi kukaFaro lezikhulu zakhe, yaphenduka yaba yinyoka. 11 UFaro wasebiza izanuse lezinyanga zaseGibhithe. Lazo zenza izimanga ngendlela efanayo. 12 Bonke baphosela izintonga zabo phansi zaphenduka zaba zinyoka. Kodwa inyoka ka-Aroni yaziginya zonke izinyoka.

13 Kodwa-ke, lanxa kwaba njalo, inhliziyo kaFaro yala ilokhu ilukhuni; njengoba uJehova wayetshilo.

Uhlupho lwegazi

14 UJehova wasesithi kuMosi, “Inhliziyo kaFaro ilukhuni; uyala ukuthi abantu bahambe.

15 Yana kuFaro ekuseni – ngesikhathi esehlela emfuleni. Ubokuma ekhunjini lomfula uNayili, umhlangabeze uphethe intonga eyaphenduka yaba yinyoka. 16 Ubokuthi kuye, ‘UJehova uNkulunkulu wamaHebheru ungithumile njalo kuwe ukuba ngizekutshela ukuthi vumela abantu bakhe bahambe ukuze bayemkhonza enkangala, kodwa kuze kube khathesi kawukalaleli. 17 UJehova uthi, Ngalokhu uzakwazi ukuthi nginguJehova: Ngentonga esesandleni sami ngizatshaya amanzi eNayili njalo azaphenduka abe ligazi. 18 Inhlanzi kuNayili zizakufa, amanzi omfula azanuka athi phu, ngakho abantu baseGibhithe abangeke babe besawanatha.’ ” 19 UJehova wasesithi kuMosi, “Tshela u-Aroni akhombele intonga yakhe emanzini aseGibhithe, lakuyo yonke imifula yakhona, lemisele yamanzi, lamaxhaphozi, lamachibi, azaphenduka abe ligazi. Igazi lizagcwala eGibhithe lasezinkonxeni zezigodo lasezitsheni zamatshe.

20 UMosi lo-Aroni benza njengokulaywa kwabo nguJehova. Waphakamisa intonga yakhe phambi kukaFaro lezikhulu zakhe watshaya amanzi kaNayili aphenduka aba ligazi.

21 Izinhlanzi zikaNayili zafa. Umfula wanuka kubi okokuthi abaseGibhithe babengeke bawanathe amanzi akhona. Igazi laseligcwele indawo yonke.

22 Kodwa izanuse zaseGibhithe lazo ngemilingo yazo zenza izimanga ezifananayo. Ngalokho inhliziyo kaFaro yala ilokhu ilukhuni. Kabalalelanga oMosi lo-Aroni njengoba uJehova wayevele etshilo.

23 UFaro wabuyela esigodlweni sakhe engakunaki lokho. 24 Sekunjalo abaseGibhithe bemba imithombo emakhunjini omfula uNayili ukuba bathole amanzi okunatha, ngokuba babengeke babe besawanatha awomfula.

Uhlupho lwamaxoxo

25 Kwedlula izinsuku eziyisikhombisa ngemva kokuba uJehova enze amanzi kaNayili aba ligazi.